Selasa, 21 Desember 2010

PUISI MARFIL DAROSSA

Cewe Manado

Lensa kontak biru, pasang di biji mata
Minya wangi di mana-mana deng
Capatu hak tinggi
bajalang rupa model
gaya so gaya
dong bilang so ini tu gaul

angin ba tiop,kana di rambu
rambu ta angka,ba bunyi floit
“twit…twit….. bole mo ‘G’?....”
Bukamaing pasung tu muka
Tu kuli pe licing…..kong putih mangkilat……

Bukang mo bakusedu
mar memang butul
Cewe Manado
Memang pe pasung-pasung…….

Hidop Anak kost

Makang kurang baku kancing
Pigi kampus kurang manumpang oto
Boleh mo bilang,so dapa sayang
Satu yang dapa herang
“Face book” lancar skali

Pulang kampus langsung ka warnet
Bilang tugas bukang………..hanya tuk tulis status…
Maitua ba sms”syng b’telp dunk….”
Pesan ta kirim “sorry cnta ni puls trkhir…”
Doi masih da Rp.20.000 hanya abis di……
“Face book”

Papa karja bangunan,Mama tukang bobaso
Dapa doi hanya untuk satu orang
“Leksi yang tercinta”
Harapan basar ,anak kalar
Jadi Sarjana

Bale ka kampus
Roko di mulu ba asap sambil ba jalang
Dosen so sama deng Toa
Mar sayang angin berlalu di talinga
So ini tu realita
Realita anak kost…………










Dosen Killer


Alaram ba bunyi……
Buku so siap deng tas so pikul
Tangan ba dola mikro sopir berenti
Mulu babunyi…….”kampus om…?”
Om ba balas…”nyanda no….”
10 mikro lewat hanya satu yang io……………

Sampe di kampus terlambat 10 menit
Dosen so ba khotbah…..
kita baru mo maso,
Tadiang berapa detik,baku haga deng dosen
Dosen tarek napas
Fyuh………….Kartu merah Ta cabu……………
Mo bilang apa so tajadi……………..

Tugas satu tambung se maso
Hanya untuk sebuah nilai “C”
Boleh mo bilang so kurang sama deng satpam di kampus
Mar sayang Kapal selam For dosen…………..
Perjuangan 1000x lipat
Supaya mo berhasil

Setiap hari bagitu, nya pake kompromi
Mar apa depe hasil skarang…………….
Dari kartu merah,deng kapal selam
Brubah jadi kartu kredit deng kapal layar for kita
Aer mata jatung for dosen
Yang da bekeng ta jadi bagini…………

Tidak ada komentar:

Posting Komentar